BAGUIO CITY – Maipasidong ti syudad ti Tabuk, Kalinga iti 14-day Enhanced Community Quarantine (ECQ) mangrugi inton Domingo, Enero 24.
Sigun kenni Tabuk City Mayor Darwin Estranero, desisyon daytoy ti City COVID-19 Interagency Task Force kasaruno ti rekomendasyon ni City Health Officer Dr. Henrietta Linden Bagayao gapu iti pannakailista ti nangato a kaso ti COVID-19 sadiay.
Kinunana nga inlawlawag ti City Health Officer a maibilang kas “highly recommended” iti pannakaipasidong ti ECQ ti Tabuk gapu iti 187 nga aktibo a kaso dagitoy iti agdama.
Malaksid iti dayta, naisingasing pay iti napartak a pannakaipatungpal ti lockdowns kadagiti lugar a nakailistaan ti nangato a kaso ti COVID-19.
Mamati dagitoy a babaen iti dayta ket malimitaran ti panaggaraw dagiti tao ken malapdan iti panagwaras ti nasao a virus kasta metten a mawayaan ti health system capacity sadiay.
Namingsan manen a kiniddaw ti mayor iti panagtulnog dagiti umili ti masakupanna iti panagtungpalda kadagiti minimum health protocols a maipatpatungpal kontra COVID-19.
