Naituding a mangipatungpal iti tallo nga aldaw a nationwide transport strike ti transport group a Manibela a mangrugi inton Agosto katorse.
Sigun kenni Mar Valbuena, ti presidente ti Manibela, makipaset dagiti nagduduma a probinsya iti nasao a transport strike kas panangkontra kenni President Ferdinand Marcos Jr. gapu iti panangipilitna a maimplementar ti Public Transport Modernization Program (PTMP) iti pagilian a Pilipinas.
Kinuna ni Valbuena a dagiti lugar a makipaset ket pakairamanan ti siudad ti Baguio, Pangasinan, Central Luzon, Isabela, Davao City ken daduma pay.
Innayon pay ti dadaulo ti Manibela a makikoordinarda met laeng iti transport group a Piston para iti nasao a banag.
Para sadiay Manila, mangrugi ti panagprotesta ti Manibela inton Miyerkules iti oras ti alas sais ti agsapa idiay Rotonda paturong Mendiola.
Nagaplikar metten dagitoy iti rally permit nupay kasta, kanayun a saan dagitoy a maap-aprobaran.
