BAGUIO CITY – Nakemmeg ti tallo nga indibidual iti checkpoint operation kalpasan a ginandatda a mangibiyahe ti minilmilyon a gatad ti marijuana sadiay Sitio Dinakan, Dangoy, Lubuagan, Kalinga idi kalman.
Amin dagiti suspek ket manipud Tulgao East, Tinglayan, Kalinga.
Maibasar iti report, nakaawat ti impormasyon dagiti otoridad seknan iti Hi-Ace model 1995 nga addaan plate number RDM 343 a nagtaud manipud Tulgao East, Tinglayan, Kalinga nga agibiyahe ti marijuana.
Maibasar iti imbentaryo, nakumpiskar dagiti operatiba ti 204 a marijuana bricks nga agdagsen ti 204,000 grams ken aggatad ti P24.4 million, dua a tubulars nga agdagsen ti 2,000 grams ken aggatad ti P240-K, ken dua a babassit a botelya a naglaon ti marijuana oil nga aggatad ti P7-K.
Sumagmamano metlaeng nga items ti nakumpiskar kas ti lugan, tallo a cellphone ken dadduma pay a drug paraphernalia.
Sumango dagiti suspek iti kaso a panaglabsing iti Republic Act 9165 or the Comprehensive Dangerous Drugs Act of 2002.
