BAGUIO CITY – Nangbukelen ti Philippine Drug Enforcement Agency (PDEA) iti task force a mangbiruk kenni PDEA Investigation Agent 1 Merton Fesway a mapapati a biktima ti panagkawtibo.
Pinirmaan ni PDEA Director General Wilkins Villanueva ti pammilin a nangbuangay iti Task Force Fesway a buklen ti 24 nga operatiba tapnu mapapartak ti panagbiruk iti mapukpukaw nga anti-drug operative.
Maipalagip a ti 38-anyos nga operatiba ket tubo ti Samoki, Bontoc, Mountain Province ken nakadestino iti PDEA-Pampanga Provincial Office sadiay Angeles, Pampanga.
Naipadamag ti panagpukawna idi rabii ti June 25, 2021 ken iti inisyal nga imbestigasyon ket makisabat kuma ni Fesway iti maysa a confidential informant sakbay ti insidente.
Inkari met ni Villanueva a saanda a sumardeng iti panagbiruk agingga a saan a masarakan ni Fesway ken mangnamnamada pay a natalged ken adda iti nasayaat a kondisyon ti nasao nga operatiba.
