BAGUIO CITY – Naituding nga ag-debut iti ONE Championship dagiti Team Lakay fighters a da world MMA champion Stephen “The Sniper” Loman ken Jenelyn “The Graceful” Olsim.
Sangwen ni Olsim ti maikalima a contender iti ONE women’s strawweight a ni Maira Mazar ti Brazil iti ONE: Fists of Fury III inton March 19 sadiay Singapore Indoor Stadium.
Ni Olsim ket produkto ti ONE Warrior Series ken silver medalist iti muay thai event ti 30th Southeast Asian Games bayat nga iggem ni Mazar ti MMA record a 7-3.
Sigun kenni Olsim, nakasaganan daytoy para iti kaunaan a labanna iti ONE Championship ken mangnamnama a maipakitana amin a naadalna kabayatan ti panagsagana ken panagsanayna.
Kabayatanna, agtultuloy met ti panagsagana ni Loman para iti panagsangoda kenni no. 1 bantamweight fighter John “Hands of Stone” Lineker ti Brazil iti ONE: TNT IV inton April 28 sadiay Singapore Indoor Stadium.
Kinunana a gundaway daytoy para kenkuana a manglaban iti maysa kadagiti best fighters iti bantamweight division.
Innayonna a napeggad ni Lineker isut gapuna a saan a nalaka ti agbalin a labanna.
Maipalagip a sakbay nga immakar iti ONE Championship ket nabigbig ni Loman kas kaunaan a longest reigning bantamweight champion ti BRAVE Combat Federation, no sadino, nabaelanna a naidepensa ti nasao a titulo iti uppat a daras.
Iggemna ita ti MMA record a 14-2.
Beterano met iti Ultimate Fighting Championship ni Lineker sakbay nga immakar iti ONE Championship no sadino, iggemna ti MMA record a 33-9.
Maipalagip pay nga idi November 2020 ket inabak ni Lineker ti Team Lakay veteran a ni Kevin Belingon a rason tapnu agbalin daytoy a numero uno a contender iti bantamweight division iti ONE Championship.
