Saan a pinatgan ti Korte Suprema ti kiddaw a Temporary Restraining Order (TRO) ken status quo ante order tapno piliten ti Senado ken Senate Blue Ribbon Committee a pagtalinaeden ken iruarda ti orihinal a draft report ti imbestigasyonda iti naanomalyaan a flood control scandal iti pagilian.
Imbes a mangiruar iti TRO, inbilin ti Korte Suprema ti Senate Blue Ribbon Commitee nga idadauloan idi ni Senator Panfilo “Ping” Lacson ken committee members a da Senators Juan Miguel Zubiri, JV Ejercito, ken Sherwin Gatchalian, a mangisumitir iti komentoda wenno pammalawag iti las-od ti 15 nga aldaw.
Ti petisyon a madamus ken certiorari ket inpila dagiti abogado a da Eldrige Marvin Aceron, Sikini Labastilla, ken Purificacion Bartolome-Bernabe tapno obligaenda ti komite nga iruarda ti saan a a na-edit ken buo a bersiyon ti draft partial report.
Sigun met iti komite, saan nga opisyal ti partial report ken mapoprotektaran daytoy ti deliberative process privilege tapno saan a maapektaran ti diskusyon iti uneg ti gobyerno.
Iti met benneg dagiti petitioners, saannen a mabalin nga aramaten ti komite ti nasao a prebilehiyo gapu ta inwaragawagen ni Senator Lacson dagiti linaon ti draft report iti media, pakairamanan dagiti rekomendasyon a mapilaan ti kaso a plunder ti sumagmamano nga opisyal ti gobyerno. //bombokaren.c.s
