Inkari ni President Ferdinand Marcos Jr. ti saan a bumaba iti ₱225 million para iti recovery efforts ken tent city kadagiti bakwit idiay Cebu a naapektaran iti 6.9-magnitude a panagdayyeg rabii idi Martes, September 30.
Sigun kenni Marcos Jr., kangrunaan a naapektaran dagiti imprastraktura nu sadino, saan a sigurado dagiti opisyales nu nasayaat ti kondisyon dagiti evacuation centers sadiay a mabalin koma a pagdagusan dagiti residente.
Gapu iti dayta, nangngeddeng ti presidente a mangibangon iti giant tents para iti tent city a mangakomodar kadagiti residente.
Maibasar iti datos iti regional civil defense office,nasurok 110,000 a tattao kadagiti 42 a komunidad ti agkasapulan iti tulong tapno matarimaan dagiti babbalayda ken makarekober kadagiti pagbiaganda.
Immuna metten nga impakaammo ti presidente a mangiruar ti opisina daytoy iti ₱150 million a tulong para iti probinsya iti Cebu ken ₱75 million kadagiti daduma pay a lugar a babaen iti Local Government Support Fund.
