BAGUIO CITY – Naipasidong iti total lockdown ti intero a munisipio ti Tinglayan, Kalinga gapu iti agtultuloy a panagngato ti kaso ti COVID-19 sadiay.
Maibasar iti pammilin ni Mayor Sacrament Gumilab, nangrugi ti total lockdown idi kalman ken agleppas daytoy inton Disiembre 21, kalpasan ti 15 nga aldaw.
Sigun iti mayor, maipatungpal ti lockdown tapno makontrol ti posibilidad a panagwaras ti virus iti munisipio.
Mainaig iti daytoy, inbilin ti mayor ti pannakamintinir ti checkpoints iti national highway dagitoy babaen iti Municipal COVID-19 task force.
Inbilinna pay ti panangipasdek ti tunggal barangay iti checkpoints iti pauneg ken paruar iti masakupan dagitoy.
Innayon ni Gumilab a posible ti extension ti lockdown sadiay Tinglayan depende iti assessment ti COVID-19 interagency task force.
