BAGUIO CITY – Ad-adda a ngimmato ti maak-akop a basura iti Baguio City kagiddan ti panag-ado ti turista a sumangsang-at iti siyudad bayat ti umadanin a holiday season.
Iti interview ti Bombo Radyo kenni Eugene Buyucan, dadaulo ti General Services Office (GSO), dinakamatna a ngimmato iti 194 tons dagiti naakop a basura idi Nobyembre nu idilig iti 175 tons a nakolekta idi Oktobre ti agdama a tawen.
Gapu iti daytoy, inlawlawag ni Buyucan a daytoy ti rason nu apay a maladladawda nga agkolekta ti basura kadagiti dadduma a barangay.
Iti baet daytoy, impeksa ti nasao nga opisyal nga ar-aramidenda ti kabaelanda tapno makolektar a dagus dagiti basura iti siyudad.
Kidkiddawenna met ti kooperasyon ken tulong dagiti umili nga isinada dagiti “nabubulok at di-nabubulok.”
Kabayatanna, imbinglayna nga inaprubaran ti konseho ti pannakaipasdek ti Central Materials Recovery Facility a mangtulong iti pannakaimanehar ti basura.//Rosemarie Bulsao
