BAGUIO CITY – Nailaylayon iti maysa a lawas ti implementasyon ti total ban wenno naan-anay a panakaiparit ti panaglako ken panagiserbi iti arak ken dadduma pay nga alcoholic products iti siudad ti Baguio.
Maipalagip nangrugi ti panakaipatungpal ti nasao a pammilin ni Mayor Benjamin Magalong idi September 11 ken nagpaso daytoy idi September 19, 2021.
Nupay kasta, kinuna iti Bombo Radyo Baguio ni Engr. Bonifacio De la Pena, city administrator, a napagnunumuan dagiti opisyal a mailaylayon ti liquor ban agingga inton Domingo, September 26.
Nupay kasta, ilawlawagna a mapalubosan ti bar deliveries kadagiti produkto ti arak kas konsiderasyon iti kiddaw dagiti bar establishment owners gapu iti panakapukaw ti trabaho dagiti agarup 40 nga empleyado dagitoy.
Agtaltalinaed met ti 30% a customer capacity kadagiti enclosed wenno indoor dine-in establishments.
Kabayatanna, impalagip ni Engr. Dela Pena a 20% ita ti venue capacity kadagitu religious gatherings wenno worship activities agingga inton September 26, 2021.
Kinuna ti opisyal a dagitoy a pagalagadan ti siyudad ti Baguio ket gapu iti agtultuloy a panagngato ti kaso ti COVID-19 a nangitunda iti 100% nga occupancy rate kadagiti ospital iti siudad.
