BAGUIO CITY – Temporaryo a mairikep ti Towing Falls sadiay Sablan, Benguet kasaruno ti insidente ti panakalmes a nakatayan ti 21-anyos a minero itay laeng malem.
Iti interview ti Bombo Radyo Baguio, kinumpirmar ni Sablan Mayor Alfredo Dacumos Jr. nga adda ti tallo nga agbabarkada a napan naglangoy iti nasao a falls nu sadino maysa kadagitoy ti pimmusay.
Saan a daytoy ti umuna a gundaway nga adda iti nalmes iti towing falls ngem iti nagsasabali a disso.
Maipalagip a nairikep daytoy idi 2020 ngem nailukat iti publiko idi Disyembre uno idi napan a tawen.
Gapu iti daytoy, nagpalagip ni Mayor Dacumos iti publiko a nu agturong kadagiti paglangoyan ket siguradoen nga adda ti life vest ken adda ti kadwa nga ammona nga aglangoy.
Kabayatanna, agtultuloy latta met ti imbestigasyon ti Sablan Municipal Police Station tapno maduktalan ti umno a napasamak.
