BAGUIO CITY – Pimmusay ti maysa a tricycle driver kalpasan a pinaltugan ti riding in tandem sadiay Deet, Tayum, Abra idi kalman.
Nabigbig daytoy a ni Dionisio Sequerra Jr., 52-anyos ken residente ti Macray Bangued, Abra bayat a saan pay a nabigbig dagiti dua a suspek.
Iti inisyal nga imbestigasion ti pulisya, nakatugaw ti biktima ken ti live-in partner daytoy iti ruar ti pagtaenganda idi kilaat a simmardeng dagiti suspek a nakalugan iti motosiklo.
Bimmaba iti motorsiklo ti backrider ken ditoyna nga inasot ti paltogna nga impaturongna iti biktima.
Timmaray ti biktima iti uneg ti pagtaenganda ngem kinamat daytoy ti suspek agingga a pinaltuganna iti lima a daras babaen iti caliber .45 a pistol.
Nagsagrap ti biktima iti ado a tama ti paltog iti nagduduma a paset ti bagi ken ulona bayat a naglipas dagiti suspek iti saan a masinunuo a deriksion.
Narekober iti nakapasamakan ti insidente ti lima a fired empty shell, maysa a deformed slug ken maysa a metallic fragment ti caliber 45 pistol.
