BAGUIO CITY – Naipasidong metten iti Extreme Enhanced Community Quarantine ti Tublay, Benguet nangrugi idi kalman agingga inton April 14, 2020.
Iti interview ti Bombo Radyo Baguio kenni Mayor Armado Lauro, kinunana paset daytoy ti addang ti lokal a gobyerno tapnu saan a makastrek iti munisipyoda ti COVID-19 nangruna ta addan ti nagpositibo iti nasao a sakit iti kaarubada a munisipyo ti La Trinidad.
Kinunana nga epektibon ti travel ban iti amin a kita ti lugan ken indibidual manipud iti alas-otso ti rabii agingga iti alas-singko ti agsapa, malaksid laeng kadagiti medical emergencies ken medical services.
Maipawil latta ti panagruar kadagiti kalsada ken parapubliko a lugar kabayatan ti curfew hour bayat a dagiti indibidual a nasken a rumwar iti curfew hour ket nasken a mangipakita iti pammaneknek kas iti work schedule ken company ID.
Naituding met ti alas-otso ti agsapa agingga alas-tres ti malem kas window hours dagiti amin nga establishimento sadiay Tublay malaksid iti DOERS multi-purpose cooperative, iti maysa a grocery store ken kadagiti drug stores nga agrikep iti alas-singko ti malem.
Innayon ni Mayor Lauro nga epekto latta ti 24/7 a municipal-wide liqour ban sadiay Tublay ken ti panagrikep dagiti amin nga establishimento iti aldaw ti Dominggo para iti disinfection iti aglawlaw ken uneg dagitoy.
Kinunana pay nga awan ti maipaay a travel permits tunggal Sabado ken Dominggo malaksid iti medical ken dialysis purposes.
Inkarina metlaeng ti panakaipataw ti kaskenan nga aksion kadagiti aglabsing kadagiti naituding a pagalagadan.
