BAGUIO CITY – Manamnama a ti Tublay, Benguet ti maikatlo a munisipyo iti Benguet a mangilukat ti turismo para kadagiti residente daytoy.
Iti panakiyuman ti Bombo Radyo Baguio, kinuna ni Mayor Armando Lauro nga iti kaudian a lawas ti Nobyembre ti puntiryada a panakailukat ti turismo sadiay.
Nupay kasta, kinunana a para laeng daytoy kadagiti umili ti munisipyo.
Sigun kenkuana, manarimaanen ti panangberipikarda kadagiti tourist sites a mabalin nga ilukatda kadagiti umili.
Inlawlawagna a daytoy ket gaputa kaaduan kadagiti tourist sites sadiay ket privately-owned isut gapuna a kasapulan ti koordinasyon kadagiti agtagikua kadagitoy ken kadagiti nagduduma nga ahensia.
Imbinglayna a kalpasan ti inspeksyon ni Department of Tourism- Cordillera regional director Jovy Ganongan ket adu dagiti nakitada a tourism sites a mabalin a mapapintas tapnu agbalin kas maysa a tourism site iti munisipyo.
Sigun pay kenni Mayor Lauro, manarimaanen ti panangisaganada kadagiti pagalagadan a suruten dagiti accommodations ken establishments iti kanito a mailukat ti turismo sadiay.
Mangnamnama met daytoy a babaen iti in-inot a panangilukatda iti turismo ket matulungan dagiti tourist guides ken dagiti umili sadiay nga agdepdependar iti turismo.
