![](https://img.bomboradyo.com/baguio/2021/01/sakura-atok.jpg)
BAGUIO CITY – Mailukaten iti publiko ti turismo ti Atok, Benguet mangrugi inton Marso 8 ti agdama a tawen.
Maibasar iti paka-ammo manipud iti mayor ti ili, mailukat ti turismo ti Atok malaksid laeng kadagiti aldaw a Lunes ken Biyernes.
Maimuntar ti temporary triage and registration area sadiay Km. 22, Caliking, Atok.
Agserbi ti nasao a disso a pagbayadan ken pakaipasidongan dagiti turista iti orientation iti nagduduma a pagaladagan sakbay ti panagturong dagitoy kadagiti pagpasayaran iti munisipyo.
Nakedngan a nasken a mangiparang dagiti bisita ti vaccination card wenno negatibo a resulta ti RT-PCR test wenno antigen test a balido iti 48 nga oras.
Maikalkalikagum pay ti pre-registration tapno maamoan ti bilang dagiti turista nga agturong kadagiti nagduduma a pagpasyaran sadiay Atok.
Maipalagip a kinuna ti mayor a mailukat ti turismo sadiay Atok iti kanito a bumaba ti alert level iti probinsiya ken iti agdama ket naipasidongen iti Alert Level 2 ti Benguet.