BAGUIO CITY – Manamnama a mailukaten ti turismo ti Benguet kadagiti umili nga agtaud iti nagduduma a probinsia iti Cordillera inton Disyembre.
Sigun iti gobernador, mapasamak daytoy iti kanito a mailaylayon agingga iti umay a bulan ti Alert Level 2 nga status ti probinsia kalpasan nangrugi daytoy idi Nobiembre 22 agingga Nobiembre 30.
Inayonna a dakkel ti tsansa a mailukat ti turismo no mamintinir ti single-digit a kaso ti COVID-19 kas ita a lawas.
Nupay kasta, impettengna a dagiti laeng fully vaccinated nga umili iti rehion ti mapalubosan nga agturong kadagiti tourist destinations ti Benguet.
Maipalagip a nailukat ti turismo ti probinsia ita a bulan ngem para laeng kadagiti umili daytoy.
Maipabiang met kadagiti lokal a gobierno ti La Trinidad, Itogon, Sablan, Tublay ken Tuba (LISTT AREA) no awatenda iti masakupanda a lugar dagiti turista nga agtuad ditoy Baguio City.
Iti agdama ket awan pailaeng ti pinal a pagalagadan ti Provincial Government ti Benguet a suroten dagiti umili iti rehion iti kanito a mailukat ti turismo dagitoy.
