BAGUIO CITY – Dumanonen iti 75% kadagiti ubbing a 0-59 months iti siudad ti Baguio ti nabakunaan iti Measles, Rubella and Polio Supplementary Immunization Activity ti Department of Health nga agleppas inton Lunes, November 30.
Iti panakiyuman ti Bombo Radyo Baguio, kinuna ni City Health Services Officer Dr. Rowena Galpo a malaksid kadagiti health centers iti siudad ket adda pay dagiti nadutukan nga agrikrikos kadagiti babbarangay tapnu idanun a mismo ti serbisyo ti panagbakuna.
Inyulitna ti pagkasapulan iti panangipabakuna dagiti nagannak kadagiti ubbingda a 0-59 months para iti oral polio ken dagiti 9-59 months para iti measles ken rubella tapnu maipasigurado ti kinatalged ti salun-at dagitoy.
Nupay kasta, inaklonna nga adda dagiti ubbing iti listaanda a saandan a mabirukan gaputa naiyawid dagitoy kadagiti probinsia bayat nga adda dagiti nagannak a nagkedked a mangipabakuna iti annakda gapu iti pammati, amak wenno buteng gapu iti kontrobersia ti bakuna a Dengvaxia ken dadduma ket addaanda ti pribado a doktor.
Iti baet daytoy, iyap-apelada ti panakikaykaysa ti amin gaputa ti programa ket para iti pagsayaatan ti salun-at dagiti ubbing.
