Napaay manen nga umannamong ti Ukraine ken Russia iti panagsardeng ti gubat iti maikadua a round ti direkta a saritaan dagitoy.
Ti kakaisuna a katulagan ti dua a benneg ket ti panagsinnukat iti ad-adu pay a balud iti gubat, agraman amin dagiti masakit ken nakaro ti pannakadangranna, kasta met dagiti agtawen ti 25 agpababa.
Sigun kadagiti Ukrainian negotiators, kinontra manen ti Russia ti awan kondisionna a ceasefire iti 30 nga aldaw, a kangrunaan a demand wenno kiddaw ti Ukraine ken dagiti kaalyadona idiay Europe ken America.
Iti naangay a panagsarita, inkari latta ti Ukriane ti pannakaisubli dagiti bangkay ti 12,000 a soldado a pimmusay iti gubat.
Iti met benneg ti Russia, naipadamag nga insingasingna ti dua wenno tallo nga aldaw a panagsardeng ti gubat iti dadduma a lugar iti front line ngem saan a nangipaay iti kanayonan a detalye.
Nasurok a maysa nga oras ti direkta a saritaan dagiti negotiators ti Ukraine ken Russia a naangay idiay Istanbul, Turkey.
