Kinumpirmar ni Manila Rep. ken House prosecutor Joel Chua a saan a maiparang iti publiko ken media ti umadani nga impeachment pre-trial ni Vice President Sara Duterte.
Inlawlawag ti House prosecutor a maangay ti private proceedings iti uneg ti Senado intun June 18 para iti pannakapinal ti operational parameters ti panagdengngeg.
Iti nasao nga impeachment pre-trial, maisayangkat ti stipulation of facts, marking of evidence, ken ti pannakaidatag ti nagan dagiti saksi.
Inyunay-unay ni Chua a maipatungpal ti restriksion tapno masigurado nga agpada a maiplastar dagiti legal team ti ebidensiada a saan a makompromiso ti aktual a panagdengngeg.
Kabayatanna, panggep ti prosecution team nga iparang ti agarup 25 a testigo tapno mapaneknekan dagiti alegasion a naiparang kontra iti maikadua a kangatuan nga opisial ti pagilian.
