BAGUIO CITY – Agtultuloy ti pananganop dagiti otoridad kadagiti lima a suspek iti pammagsol iti kapitan ti Barangay Lingtan sadiay Bangued, Abra itay laeng kanikadua.
Nabigbig dagitoy a da Jerwin Millare, Danilo Bergonia, Julius Bergonia, Michael Lombo ken Clifford Laureta Melo.
Immuna metten a nabigbig ti biktima a kapitan a ni Claudio Barbadillo Bobias.
Sigun ken Capt. Noel Bagtuna, hepe ti Bangued MPS, nagtitinnulung dagiti suspek a nangbagbagsol iti biktima agingga a naawanan daytoy ti anges.
Manarimaan ti panag-inom ti kapitan iti arak iti ruar ti maysa a pagtagilakuan sadiay Lingtan, Bangued idi killaat a binagbagsol daytoy dagiti suspek.
Naamwan a nagsagrap ti kapitan iti 24 a bagsol iti nagduduma a paset ti bagina.
Kinunana a panagibales ti makitkitada a motibo iti krimen gaputa dagiti lima a suspek ket kabagian daydi daydi Robin Bergonia, 24-anyos a maipagarup a pinaltugan ti kapitan ken ti anakna idi napalabas a bulan ti Marso.
Maipalagip a karkaruwar laeng ti kapitan manipud iti pagbaludan kalpasan a nagpiansa iti nasao a kaso daytoy.
Maibasar iti rekord, pinalpaltogan ti agama a Bobias daydi Robin Bergonia kas panagbalesna gaputa kasinsin daytoy ti maysa kadagiti suspek a nangpalpaltog iti kapitan bayat ti panakibantayna iti quarantine checkpoint ti barangayda.
