BAGUIO CITY – Naiyakaren iti pagagasan ti lima kadagiti siyam a pulis manipud iti Regional Mobile Force Battalion (RMFB) – 15 ti Cordillera PNP a nadangran iti panagbettak ti improvised explosive device nga inkali dagiti agliblibas a komunista a New People’s Army iti nagbaetan ti Bauko ken Tadian sadiay Mt. Province idi April 2.
Naamuan a naiyakar dagiti nasao a lima iti pagagasan ditoy probinsia ti Benguet bayat nga agtaltalinaed met iti pagagasan sadiay Montañosa dagiti nabatbati nga uppat.
Kabayatanna, naituding a maitabon inton April 11 ti bangkay daydi Police Corporal Marlon Casil a pimmusay iti nasao nga insidente.
Nakamassayag ti bangkayna iti pagtaenganda sadiay Lipucan, Poblacion, Kibungan Benguet.
Sigun kenni Police Captain Marshall Valdes, hepe ti Kibungan PNP, maipaayan ni PCpl. Casil iti military honors babaen iti unit daytoy kas panangbigbigda iti kinabanuar daytoy.
Kabayatanna, ipalpalagip ti lokal a gobyerno ti Bauko, Mt. Province nga adda ti resolusyon dagitoy a nainget a mangtubtubngar iti iseserrek wenno aniaman nga access dagiti komunista nga NPA ken dadduma pay nga armado a grupo kadagiti komunidad sadiay.
