BAGUIO CITY – Maipaspasidongen iti quarantine dagiti lima nga indibidual a naaddaan iti close contact iti empleyado ti gobyerno manipud Parañaque a dimmar-ay iti maysa a seminar ditoy siudad ti Baguio idi March 9-11 ken nagdiskobre a positibo iti COVID-19 iti panagsublina sadiay Metro Manila.
Sigun kenni Dr. Donnabel Tubera-Panes, Medical Officer IV ti City Health Services Office, natalged metten ti kasasaad dagiti nasao nga indibidual.
Inlawlawagna nga amin a participants iti conference a dinar-ayan ti nasao a pasyente ket national officials ken awan ti nagtaud ditoy Baguio.
Kinunana a nakontakna metlaeng ti maseknan a pasyente ken naamuanna nga ur-urayen laengen ti balasang ti resulta ti test daytoy tapnu makita no negatibon daytoy iti coronavirus.
Immunan a kinuna ni Mayor Benjamin Magalong a nangisayangkaten iti disinfection ken complete sanitation protocol ti hotel sadiay Camp John Hay a nagdagusan ti nasao a pasyente ken dagiti kakadwa daytoy bayat a naipasidongen iti self-quarantine dagiti maseknan a personnel ti hotel.
Naamuan nga addaan travel history sadiay Japan ti nasao a balasang idi napalabas a bulan ken idi nagturong ditoy siudad ket awanan iti gurigor ken rimwar laeng ti resulta a positibo daytoy iti COVID-19 idi nagsubli sadiay Manila.
Naamuan pay a malaksid iti convention venue ken iti hotel a nagdagusan ti grupo ti nasao a pasyente ket nagturong pay daytoy iti sumagmamano a panganan ditoy Baguio ken uray pay iti City Public Market.
