BAGUIO CITY – Naduktalan ti panagilako ti 51 a business establishments ditoy siudad ti Baguio iti face shields a nangingina no idilig iti naituding a suggested retail price (SRP) ti face shield a P26-P50.
Resulta daytoy dagiti inspeksion nga insaysayangkat dagiti nagtipon a personnel ti Department of Health-Cordillera, Department of Trade and Industry-Cordillera ken Permits and Licensing Division ti City Mayor’s Office kadagiti pakabuklan a 130 nga establishimento ditoy lokalidad.
Sigun kenni Permits and Licensing Division head Allan Abayao, naipaayan iti letters of inquiry dagiti nasao nga establishimento.
Kinunana a nailanad iti surat a nasken nga agpalawag dagiti nasao nga establishimento no apay a nangatngato no iti SRP ti presyo ti lakoda a face shields.
Innayonna a maipaayan to iti notice of violation nga addaan pannusa dagiti establishimento nga agtultuloy a manglabsing iti SRP ti face shields.
Kabayatanna, pakabuklan met a 79 a pagtagilakuan ti nasukimat nga agtungtungpal iti SRP.
Immuna metten nga imbilin ni Mayor Benjamin Magalong ti kampanya kontra kadagiti pagtagilakuan a manggungundaway iti nangato a pagkasapulan ita iti face shield.
