BAGUIO CITY – Nabigbigen ti bangkay ti lalaki a nasarakan iti waig iti asideg ti Kennon Road Viewdeck sadiay Camp 7, Baguio City idi pay Martes, May 25.
Nabigbig daytoy a ni Jun Balacday Anton, 26-anyos, baro, laborer, tubo ti Ambongdolan, Tublay, Benguet ken residente ti Liwanag-Loakan, Baguio City.
Ti nasao a bangkay ket binigbig mismo iti amana a ni Wilton Anton.
Iti panakiuman ti Bombo Radyo Baguio, kinuna ni Wilton Anton a napukaw ni Jun idi rabii ti Sabado, May 22 kalpasan a nagpakada a makisinnarak kadagiti pagayamna ken nag-iinom dagitoy ti arak.
Nupay kasta, atapenna a saan laeng a natnag iti waig ti anakda isut gapuna a kidkiddawenda ti naun-uneg pay a panangimbestigar dagiti otoridad iti napasamak.
Kiniddaw met ti pamilyada ti panakai-cremate ti bangkay ni Jun tapno maiyawid iti pagtaenganda sadiay Liwanag-Loakan.
Naamuan a naitabonen ti nasao a bangkay kalpasan a nasarakan daytoy idi napalabas a Martes.
