BAGUIO CITY – Nabigbigen ti bangkay ti maysa a biker a nasarakan sadiay Camp 1, Tuba, Benguet idi pay March 13.
Segun iti Tuba Police, binigbig ni Mrs. Clara Soriano ti bangkay ti anakna a ni Joey Tomas Soriano, agtawen iti tallopulo ket tallo, awanan iti asawa, ken residente ti Binmaley, Pangasinan.
Kinunana a nga addaan iti mental disability ti anakna ken pimmanaw daytoy iti balayda idi March 11 babaen iti mountain bike.
Nangegda laengen ti maipapan iti nasarakan a bangkay ti biker ken kinumpirmarna a daytoy ti anakna.
Nagkedked met daytoy nga ipasidong ti anakna iti otopsiya ken dagusna nga inyawid sadiay Pangasinan.
Immunan a kinuna dagiti pulis a posible a natinnag ti lalaki iti rangkis nga aguneg iti duapulo ket lima a kadapan ken posible a naitupak ti ulona a nangitunda iti ipupusay daytoy.
