BAGUIO CITY – Naibaluden ti minero a kangrunaan a suspek iti brutal a panakapapatay ti maysa nga underground patrol ti Lepanto Mines sadiay Sapid, Mankayan, Benguet idi March 20.
Nabigbig ti nasao a minero a ni Ralph Magguiya Cadatal, 33-anyos, baro ken tubo ti Taloktok, Tanudan, Kalinga.
Nakemmeg ni Cadatal babaen iti bileg ti warrant of arrest nga impaulog ni Presiding Judge Daniel Mangallay ti Regional Trial Court – Branch 64, Abatan, Buguias, Benguet gapu iti kasona a murder wenno pammapatay nga awanan ti piyansa.
Sigun iti Mankayan PNP, nakemmeg ti suspek idi rabii ti April 16 iti maysa a bunk house sadiay San Roque, Paco, Mankayan, Benguet.
Kinuna ti pulisya a ti panagtaray ti kaso ket babaen iti nainget nga imbestigasyonda ken iti testimonya dagiti testigo.
Maipalagip nga idi March 20 ket nagbagsol ken napapatay ti biktima a ni Marvin Hidalgo Del Rosario, 29-anyos, naasawaan, underground patrol ti Lepanto Mines, tubo ken residente ti Concepcion, Cervantes, Ilocos Sur.
Maatap a natnag ti biktima iti 400 a metro manipud iti collar chute ti kompanya kabayatan ti panagtrabahona ken dagus a naiturong daytiy iti pagagasan ngem naideklara a pimmusay.
Nupay kasta, saan a mamati ti pamilya ti biktima nga aksidente ti napasamak gapu kadagiti dunor a nasagrap ti kabagian dagitoy.
