BAGUIO CITY – Kidkiddawen dagiti stakeholders ti vegetable industry iti lokalidad ti panakikoordinar ti Department of Agriculture (DA) – Central Office iti Bureau of Customs (BOC) para iti panakaduktal ti kinapudnona iti damag nga adda ti nakastrek iti pagilian nga imported a repolyo manipud China.
Sigun kenni Agot Balanoy, General Manager ti maysa a kooperatiba dagiti mannalon, naawatdan ti resulta ti imbestigasyon ti DA-Central Office iti nasao nga isyu.
Kinunana nga uray awan ti nadanun dagiti personnel ti ahensia a nagturong iti Divisoria sadiay Manila ket adda met dagiti nakauman dagitoy a nangibaga a dagiti lakoda ket repolyo a naggapu sadiay Cagayan De Oro ken adda pay dagiti vendors a nangaklon nga adda ti mailaklako sadiay a naggapu China.
Nupay kasta, nailanad iti report ti DA-Central Office nga awan ti wagasda a mangkumpirmar no adda dagiti imported wenno smuggled a repolyo sadiay Divisoria.
Imbinglay ni Balanoy a dagiti repolyo a kadawyan nga agtataud sadiay Cagayan De Oro ken Cebu ket naiduma ti itsurana ken saan a unay a naurnos ti packaging dagitoy.
Dinakamatna a dagiti maibagbaga a repolyo manipud China ket saggaysa a nabungon ken nakaplastik a kas iti packaging dagiti naduktalan nga smuggled carrots a naggapu metlaeng iti China a kapada ti packaging dagiti prutas nga agtataud met laeng manipud China.
Innayonna nga ammo dagiti buyers sadiay Manila ti nagdumaan dagiti repolyo manipod Cagayan De Oro ken Cebu no idilig iti nagtaud sadiay China ken iti Benguet.
Gapu iti daytoy, kinunana a nasken a makitinnulong ti DA-Central Office iti BOC para iti naun-uneg nga imbestigasyon iti isyu ken ti panakaisayangkat ti kaskenan nga aksion no maduktalan a pudno ti damag.
Inaklon pay ni Balanoy nga adda dagiti buyers a maamak a mangiruar iti impormasion seknan iti iligal a panakaiserrek iti pagilian dagiti nateng manipud China gapu ti pangta iti biag dagitoy manipod kadagiti smugglers.
Impettengna a dakkel ti epekto daytoy kadagiti traders gaputa bimmasiten ti al-alan dagiti buyers a repolyo manipod iti lokalidad nga intunda ti nalaka unay a repolyo a mailaklako sadiay Manila a maatap a nagtaud sadiay China.
