Uppat laengin a babarangay iti Baguio City ti saan pay a nakaisubmitir iti agdama kadagiti annual budgetda para inton 2025.
Iti panakiuman ti Bombo Radyo kenni Rocky Aliping, presidente ti Liga ng mga Barangay-Baguio, puntiryada ti ciento por ciento a panakaaprobar dagiti barangay budget para iti panakarepaso daytoy inton Enero 2025 tapno maliklikan dagiti re-enacted ken tapno dagus a maipatungpal dagiti programa ken plano ti tunggal barangay.
Sigun kenni Aliping, agtultuloy ti panangasistarda kadagiti uppat a barangay tapno maisumitirdan dagiti budgetda sakbay ti naituding a deadline inton October 15.
Inlawlawag ni Aliping a kaspangarigan saan a makapagsumitir dagiti babarangay iti budgetda sakbay wenno bayat ti naituding a deadline ket posible a ma-freeze dagiti account dagitoy ken malimitaran ti ma-withdrawda a pondo kas kadagiti maaramat iti panakaiyimplimentar dagiti proyekto.
Nupay kasta, kinuna ti opisyal nga agtultuloy ti panagreggetda para iti tarigagayda a “no barangay left behind policy” babaen iti panangisayangkatda iti orientation kadagiti barangay officials partikular kadagiti treasurers ken committee on appropriations.
Kabayatanna, maragsakan dagitoy gapu ta bassit laengen dagiti barangay a saan pay a nakaisumitir kadagiti budgetda para inton umay a tawen.//Bombo Rob Dominguez
