Naarestar ti uppat nga indibidual iti insayangkat dagiti otoridad a search warrant idiay #200 A Lower Cypress, Irisan Baguio City idi kalman, January 19, 2025.
Nabigbig dagiti suspek a ni AKA Ripag, 40-anyos; AKA Toti, 30-anyos; AKA Bario, 38-anyos, bin-ig a tubo ti Marawi City ken AKA Akhmad, 36-anyos manipud Cagayan de Oro.
Amin dagiti suspek ket agnanaed idiay #200 Lower Cypress Irisan, Baguio City.
Nakumpiskar manipud kadagiti suspek ti walo a pidaso ti heat sealed transparent plastic sachet a mapapati a shabu ken agdagsen iti 11.2 grams.
Addaan daytoy iti Standard Drug Price a P74,800.
Nakumpiskar metlaeng manipud kadagiti suspek ti maysa nga improvised tooter; maysa a blow torch ken maysa a roll ti aluminum foil.
Iti agdama, addan dagiti suspek iti kustodiya dagiti otoridad para iti kaskenan a dokumentasion ken umno a disposisyon.
Balligi ti operasion babaen iti nagtipon a pwersa iti RPDEU PRO CAR (Lead Unit), RID, Station 9, CIU, CDEU ken RIU 14.
