BAGUIO CITY – Bimmaba ti kaso ti Violence Against Women and their Children (VAWC) iti maikatlo a kwarter iti agdama a tawen.
Iti panakiuman ti Bombo Radyo kenni PMaj. Harriet Bulcio, panakangiwat ti Baguio City Police Office, daytoy ket gapu iti panagregget ti opisina nu sadino maipatpatungpal ti nagduduma a programa.
Karamanen ditoy house-to-house visitation partikular dagiti barangay a nangato ti kaso-na nu sadino kasarita da dagiti residente seknan iti karbengan ken palagip kadagiti menor-de-edad, ken dagiti biktima a mabuteng iti panangireport kadagiti saan a napintas nga aramid kadakuada.
Malaksid iti dayta, maisaysayangkat metlaeng ti Oplan Pani-o wenno ti after-care para kadagiti biktima ti panagrames.
Maipatpatungpal pay ti information drive kadagiti pagadalan tapno maipakaammo kadagiti agtutubo dagiti acts wenno aramid a manglabsing iti karbengan dagitoy.
Dinakamat ni PMaj. Bulcio a babaen kadagiti naserbi a warrant of arrest ket nakemmeg dagiti suspek nupay naladaw ti panangipadamag kadagitoy.
Kabayatanna, kaadwan kadagiti kita ti panag-abuso a napasamak kadagiti biktima ket physical abuse, sexual abuse ken panagrames nu sadino kadawyan kadagiti suspek ket kabagyan dagitoy.
Maipalagip a ngimmato ti kaso ti Violence Against Women and their Children iti umuna ken maikadua a kwarter iti agdama a tawen.
