BAGUIO CITY – Marugianen ti panakaibangon ti Vegetable Packaging and Processing Facility ti Benguet Agri-Pinoy Trading Center (BAPTC) sadiay La Trinidad, Benguet.
Kasaruno daytoy ti naisayangkat a ground breaking ceremony iti nasao a proyekto nga indauluan ni Agriculture Secretary William Dar.
Naponduan ti maibangon a pasilidad iti P40-M ken makabilan daytoy kadagiti pagkasapulan a kagawaan para iti packaging ken processing dagiti nateng.
Sigun kenni Sec. Dar, iti pasilidad a maiproseso dagiti saan a nailako a natnateng dagiti mannalon iti kanito nga adu unay wenno sobra ti suplay ken iti kanito a nalaka unay dagiti nateng.
Mangnamnama daytoy a makatulong ti pasilidad iti panakaliklik ti panakalugi dagiti mannalon manipud Benguet, Mountain Province ken Ifugao a mangiturturong ti natengda iti BAPTC.
Kabayatanna, naipaayan pay ti BAPTC iti P40-M a seed capital a maipaluspos met iti Benguet State University a maaramat iti panakagatang dagiti saan a nailako a natnateng a maiturong iti BAPTC tapnu maprebentaran ti panakasayang dagitoy ken ti panakalugi dagiti mannalon.
