Kiniddaw ni Vice President Sara Duterte iti Senate Impeachment Court nga ibasurada ti Articles of Impeachment kontra kenkuana.
Maibasar iti sungbat ti bise presidente nga insubmitir ti abogadona iti Senado idi kalman, kinuna ti bise presidente a ti reklamo ket maatap a saan a naibasar iti pagalagadan ti Konstitusion ken rumbeng a maibasura.
Maysa kadagiti kangrunaan nga argumento ti kampo ti Bise Presidente ket ti maipagarup a linabasan ti Senado ti turay ti House Committee on Justice, kalpasan nga insayangkatda ti inawaganda a “mini-trial” iti pannakadengngeg ti kaso.
Sigun iti depensa, ti laeng Kamara ti addaan iti bileg a mangirugi iti impeachment proceedings, bayat a ti Senado ti addaan iti pagrebbengan a mang-usig ken mangikeddeng iti kaso.
Impagagetget metlaeng ti depensa a nalabsing ti karbengan ti Bise Presidente iti due process gaputa, naidatag ti baro nga ebidensia kabayatan ti hearing a maatap a saan a nairaman iti orihinal a reklamo.
Kabayatanna, nainget nga inlibak ni VP Sara dagiti alegasion mainaig iti mapapati a a saan nga umno a pannakaramat ti confidential funds, unexplained wealth , ken panaglabsing iti Statement of Assets, Liabilities and Net Worth (SALN).
Impaganetget ti kampo ti bise presidente nga awan paylaeng ti maudi a desision manipud iti aniaman a korte a mangpaneknek iti graft, corruption, plunder, wenno aniaman nga iregularidad iti pannakaaramat ti nasao a pondo.
