Nagpiyansa dagiti 26 a vloggers, pakairaman dagiti Cordilleran vloggers a nakemmeg iti Munisipio ti Mankayan, Benguet gapu iti maatap a pannakairamanda iti Illegal online raffle draw.
Iti interview ti Bombo Radyo Baguio, dumanon iti P36k ti piyansa ti tunggal masya kadagiti vloggers.
Nakaala ti atension iti Publiko ken supporters dagiti vloggers ti pannakakemmeg dagitoy.
Sigun kadagiti sumagmamano a netizens, lehitimo ti nasao a raffle draw ken adu dagiti benepesiario a natulungan ken agnum-numar iti daytoy.
Nupay kasta, maatap nga awannan dagitoy iti permit wenno government authorization a mangisayangkat iti raffle draw.
Iti impormasion a nakalap ti Bombo Radyo Baguio, addaan laeng dagitoy iti Permit to Conduct Charity ngem maatap nga awananda iti Permit to Conduct Raffles and Draws.
Gapu iti dayta, nilabsingda ti Presidential Decree (PD) 1602, in relation to Sec 6 ti Republic Act 10175 wenno Cybercrime Prevention Act of 2012.
Nakumpiskar manipud kadagiti suspek ti raffle paraphernalia, pakairaman ti Tambiolo bayat nga adda paylaeng iti Police Regional Office – Cordillera sadiay Camp Dangwa dagiti saan a nailako a tickets.
Maipalagip a nakemmeg dagitoy idi Agosto 30, 2025 babaen iti panangidaulo ti Philippine National Police Anti Cybercrime Groups (PNP-ACG) Lead Unit; Cyber Response Unit; Regional Anti Cybercrime Unit- Cordillera (RACU-CAR); Mankayan Municipal Police Station (MMPS); Benguet 1st Provincial Mobile Force Company ken representative manipud iti Philippine Amusement and Gaming Corporation (PAGCOR).//Bombo Noveh Organo
