BAGUIO CITY – Guyguyuguyen ti La Trinidad Municipal Police Station ti publiko a makipasetda iti La Trinidad Neighborhood Program ti lokal a gobyerno ken ti pulisya babaen ti panagmiyembro dagitoy iti nasao a programa.
Iti panakipatang ti Bombo Radyo kenni Police Major Joeffer Banglayan, hepe ti La Trinidad PNP, kinunana a nasayaat ti panggep ti programa tapnu maksayan ti kaso dagiti krimen iti nasao nga ili.
Kinunana a maguyuguy ti uray asino a grupo ken indibidual nga adda ti cellphone-na nga agturong iti opisinada tapnu ag-fill-up ti form.
Innayonna a maipasidong dagiti volunteers iti panagsanay seknan iti umno a wagas ti panagipadamag kadagiti detalye ti insidente a mapaspasamak iti ayan dagitoy a lugar.
Impalawag pay ni Banglayan nga agserserbi a CCTV camera dagiti miyembro ti nasao a programa ken saanen a kasapulan ti validation no agireport dagitoy iti pulisya.
