Nalaos ti panagyaman ni wheelchair racer Jerrold Mangliwan iti suporta nga impaay dagiti kailyan daytoy iti panakisalipna iti kalleppas a 2024 Paris Paralympics.
Iti panakiuman ti Bombo Radyo kenni Mangliwan, imbinglayna a naragsakan daytoy iti insagana a programa dagiti Cordilleran nga adda sadiay France kas panangsangaili ken panangipakitada iti suportada kenkuana.
Sigun iti paralympian, maysa ti nasao nga aktibidad kadagiti kapadasan a saanna a malipatan iti nasao a karera.
Malaksid iti dayta, agyamyaman metlaeng ni Mangliwan iti ipapaay a suporta ti gobyerno ken dagiti daduma pay a pribado nga organisasyon kadagiti para athletes nu sadino, mangnamnama nga agtultuloy daytoy para iti ad-adda a panagdur-as ti para athletes iti pagilian.
Mainaig iti dayta, imbinglay ni Mangliwan a nakaawat daytoy iti insentibo ken presidential citation bayat a naipatungpal ti panangkablaaw kadakuada ni President Ferdinand Marcos Jr. idi kalman idiay Malacañang Palace.
Kabayatanna,inaklon ti paralympian a saan daytoy a napnek iti nagbalin a performancena iti 2024 Paris Paralympics gapu ta saan unay a nakapag-adjust daytoy iti panangiduronna iti ligay ti wheelchair gapu metlaeng iti napigsa a tudo a napasaran sadiay.
Nupay kasta, naragsak latta daytoy iti suporta a nakitana kadagiti agbuybuya nangruna dagiti Pilipino a nakidar-ay sadiay.
Iti sabali a bangir, saan pay a sigurado ni Mangliwan nu makisalip daytoy iti 2028 Los Angeles Paralympics ngem iti agdama, agtultuloy ti panagensayo ken panagrekober daytoy.//Bombo Rob Dominguez
