Imbutaktak ni sigud nga Ako Bicol Party-list Rep. Zaldy Co a dumanon iti P50 bilion ti gatad manipod iti maibagbaga a ghost flood control projects idiay Bulacan ti naited kenni President Ferdinand Marcos Jr.
Daytoy nakabasar iti maikatlo a paset ti nairuar a video daytoy idi kalman.
Sigun kenni Co, adda pay dagiti ibutaktakna karaman ti mapapati a P56 bilion a kickbacks nga impaayda kenni President Marcos nu sadinno maibagbaga nga adda metlaeng ti maal-ala ni sigud a House Speaker Martin Romualdez.
Kinuna ni Co a ti P21 bilyon nga impadamag ti Independent Committee for Infrastructure (ICI) seknan iti korapsion iti ghost flood control projects idiay Bulacan a nakairamanan ti naikkat a ni Engineer Henry Alcantara ket dakdakkel pay ken dumanon iti P56 bilyon.
Impaganetgetna nga awan ti naawatna a bingay ken nagserbi laeng kas mangitultulod iti kuarta.
Kinunana nga iruarna iti sumarsaruno nga aldaw ti kanayunan a detalye ken listaan dagiti proyekto nga ibagbagana.
Maipalagip nga iti umuna a paset ti serye ti statement-na idi Biernes, kinuna ni Co nga imbilin ni Presidente Marcos ti pannakaikabil ti P100 billion iti 2025 national budget, a ti P25 billion ket mapapati a napan iti Presidente kas kickback.
