Temporaryo a naisardeng ti search and rescue operation kadagiti dua nga indibidual a mapukpukaw kalpasan a natnag ti naglugananda iti Chico River idiay Gawa, Tocucan, Bontoc, Mt. Province itay agsapa, October 27, 2025.
Iti interview ti Bombo Radyo iti Bontoc Municipal Police Station, kinuna daytoy a saan a nasayaat ti paniempo iti agdama rason a maisardeng paylaeng ti panangbirukda iti dua a lalaki a mapapati a naiyanod iti nasao a karayan.
Nabigbig dagiti mapukpukaw a da Carlo Ancheta ken Edmund Romeo, agpada a residente ti Pangasinan.
Immuna metten a nabirukan ti bangkay dagiti tallo a kadwada a da Rogelio Dela Cruz Jr, JC Galicia, agpada a residente ti Pangasinan ken ni Zoren Jay Alat, driver manipud Zamboanga.
Sigun iti Bontoc Municipal Police Station, alas sais itay agsapa a nakaawatda ti awag maipapan iti napasamak nga aksidente idiay Bontoc – Tabuk Enrile Road a nakairamanan ti blue elf truck, ti nagluganan dagiti biktima.
Iti inisyal nga imbestigasyon, adda ti dua a lugan a nakaparada nga awan kargana iti igid ti kalsada ken nadungpar daytoy ti elf truck a nagluganan dagiti biktima.
Gapu iti napigsa nga impact, nagduretso a natnag ti elf truck iti rangkis nga addaan kauneg a 150-170 metro agingga a nalned dagitoy iti Chico River.
Manarimaan ti koordinasyon dagiti otoridad iti pamilya dagiti biktima.
Kinuna ti Bontoc Municipal Police Station a saanda pay a makaipaay iti kompleto nga impormasyon agsipud ta madama ti ipatpatungpalda nga imbestigasyon.//Bombo Cara Sacyaten