BAGUIO CITY- Iyap-apela ita dagiti negosiante ken umili ti Lourdes Subdivision ken Dominican Hill ti dagus a panangituloy dagiti telcos company kadagiti nabaybay-an a patrabaho dagitoy.
Sigun kadagiti maseknan, nasuroken iti lima a bulan sipud kinali dagiti kontraktor ti telcos company dagiti kalsada iti masakupanda a barangay tapno mangilatagda kadagiti high fiber optic cables para iti internet ngem agingga ita ket nakatiwangwang dagitoy.
Sigun met kenni sigud a Philippine Boxing Coach ken agdama a negosiante a ni Glizerio Catolico, dakkel a parikot kadakuada dagiti nakatiwangwang a kalsada gaputa mangituntunda daytoy iti nailet a gunay ti trapiko.
Kinunana a masdaawda nu apay a saan daytoy nga ipapaayan atension ti lokal a gobierno nangruna ta posible a mangitunda pay daytoy ti disgrasia kadagiti motorista.
Impettengna a dagdagen koma ti lokal a gobierno dagiti telcos company tapno mapapartak ti panakaituloy ken panakaileppas dagiti nabaybay-an a patrabaho dagitoy.
