![](https://img.bomboradyo.com/baguio/2021/06/strawberry-la-trinidad.jpg)
BAGUIO CITY – Nagpalawag ti dadaulo ti Benguet State University (BSU) iti saan pay a panaka-aksion ti kiddaw a diskwento iti abang dagiti vendors sadiay Swamp, La Trinidad, Benguet kasaruno ti panagkapoy ti mapaspastrekanda it a pandemya.
Immuna iti daytoy, kiniddaw dagiti maseknan a vendors a maksayan ti P500 nga abangda tunggal lamisaan gaputa agtultuloy latta a baybayadanda ti nasao a gatad iti baet a nairikep ti pwestoda idi naipasidong ti Benguet iti Enhanced Community Quarantine.
Iti met interview ti Bombo Radyo Baguio, kinuna ni BSU President Dr. Felipe Comila a mariknada ti mapaspasaran dagiti nasao a vendors.
Nupay kasta, kidkidawenna ti at-atiddog pay a panagpasensiya ken panakaawat dagiti nasao a vendors.
Inlawlawagna nga adda idi ti panggep wenno tungtungan a tallo a bulan a panakasuspindir ti abang dagiti nasao a vendors a maiyemplementar koma idi Marso agingga Mayo ti agdama a tawen.
Nupay kasta, saan daytoy a naipatungpal gaputa kasapulan pay ti desisyon wenno panang-aprobrar dagiti miembro ti Board of Regents ti BSU.
Inaklonna a manipud nagtugaw daytoy iti takem idi Nobyembre ti napalabas a tawen agingga ita ket awan pay ti napasamak a panagtaripnong dagiti miembro ti Board of Regents ti BSU.
Innayonna a karit kenkuana ita ti panakaituloy ti panagtaripnong dagiti miembro ti Board of Regents ti unibersidad gapu kadagiti nagduduma a pakaseknan.
Kagiddan iti daytoy, kiniddawna ti panangiyuman latta dagiti vendors iti pakaseknan dagitoy iti nasao nga pagadalan babaen iti opisinana tapnu maidanonna met iti Board of Regents iti kanito a matuloyen ti panagtaripnong dagitoy.
Impasiguradona pay a dumanon amin dagiti immunan nga inyuman dagiti vendors a pakaseknan dagitoy.