Pimmusayen ita a rabii ti maysa kadagiti napaltugan iti napasamak a road rage incident idiay Antipolo City a napasamak idi Domingo ti malem.
Sigun kenni Police Lieutenant Colonel Ryan Manongdo, chief ti Antipolo City Police, pimmusay ti biktima a nagsagrap ti tama iti bala iti ulo iti oras ti 6:05 iti ospital.
Gapu ti ipupusay ti biktima, kinuna ni Manongdo a maipangato ti naipila a reklamo kontra iti suspek iti nadagsen a kaso.
Sigun kenkuana, ti pimmusay a biktima ket ti nakita iti viral video a pinaltugan ti suspek iti asideg ken kellaat a natnag iti asideg ti pilid ti SUV daytoy.
Immuna a naipadamag nga uppat ti nadangran iti napasamak a pammaltog ti suspek a napasamak iti Marcos Highway a paset ti Barangay San Jose, Antipolo City.
Iti tallo a nadangran ti suspek, nakaruaren iti ospital ti dua bayat a naipasidong iti operasyon ti maysa a kritikal ti kasasaadna, nga isut pimmusay ita a rabii.
Karaman metlaeng kadagiti natamaan ti bala ti maysa a babai a kadua mismo ti suspek.
