BAGUIO CITY – Pimmusay ti maysa a lalaki bayat a nadangran ti kadwana kalpasan a nagaburan dagitoy iti maysa a kalsada sadiay Saliok, Natonin, Mountain Province idi kanikadua.
Nabigbig dagiti pimmusay a ni Jernel Umbalin, 27-anyos bayat a nabigbig ti nadangran a ni Jeofrey Abuan, 29-anyos, agpada a residente ti Lasam, Cagayan.
Sigun kenni PCol. Clarence Casillio, dadaulo ti Mountain Province PNP, nakalugan dagiti dua a biktima iti motorsiklo ken agdaldalyasatda iti kalsada.
Kinunana a ditoy a nakita dagiti dua ti maysa a lugan a na-stranded gapu iti panagreggaay ti daga.
Tinulongan dagiti dua a biktima ti driver ti na-stranded a lugan.
Nupay kasta, iti panagsublida iti ayan ti motorsikloda ket killaat met a nargaay ti ngato ti bantay a batog ti ayan dagiti biktima a nagresulta iti panakagabur dagitoy.
Naitaray dagiti biktima iti Natonin Municipal Health Office ngem naideklara a dead-on-arrival ni Umbalin. (-with Bombo Florence Paytocan)
