BAGUIO CITY – Nagpositibo iti African Swine Fever (ASF) virus ti 10 kadagiti 13 a blood samples a nakolektar manipud kadagiti burias a nakumpiskar sadiay Bulanao Centro, Tabuk, Kalinga idi napalabas a July 28 ti agdama a tawen.
Nailanad daytoy iti resulta ti lab tests a naawat ti Kalinga Provincial Veterinary Office.
Sagudayen ti pagalagadan iti panakaimaton ti ASF ti panakaipatungpal ti depopulation kadagiti nabatbati a baboy apaman nga adda ti agpositibo iti ASF a kakadwa dagitoy.
Sigun met kenni Dionica Mercado, panakangiwat ti provincial government ti Kalinga, imballaag metten ti Provincial Veterinarian sadiay ti panagliklik dagiti umili manipud iti panaggatangda kadagiti baboy ken karne ti baboy nga agtataud iti ruar ti probinsia.
Gapu iti daytoy, ad-adda nga inirtengan dagiti otoridad ti panagsukimat ken panagbantay kadagiti animal quarantine checkpoints sadiay Kalinga tapnu maliklikan ti panakaiserrek sadiay ti ASF virus.
Inyunay-unayna pay a nasken a malapdan ti panakaiserrek ti ASF virus sadiay Kalinga nangruna ta saan pay a naideklara nga ASF-free ti Tabuk City a kangrunaan a nakailistaan ti kaso ti ASF ken maibilbilang latta a red zone gapu iti outbreak ti ASF.
Iti baet daytoy, dinakamat ni Mercado a naipaayan metten iti kompensasyon dagiti kwalipikado a hog raisers a naapektaran ti SAF outbreak.
Imbinglayna a nasuroken iti 1,400 dagiti baboy a napapatay sadiay Tabuk City gapu iti panagpositibo dagitoy iti ASF virus.
