by: Bombo Benjoryan Guzman
LA TRINIDAD, BENGUET – Agtultuloy ti panangtarimaan ken panangibagon dagiti flower growers idiay La Trinidad, Benguet kadagiti nalayos ken nadadael a mulada a sabong a naapektaran iti panagdalapos ti Super Typhoon Egay.
Iti interview ti Bombo Radyo Baguio, kinuna ni Andy Colte Jr., Siyentistang Magsasaka ng Cutflower Industry ng Pilipinas, agarup sangapulo a porsiyento ti mulada a sabong ti naapektaran iti nasao a kalamidad.
Impettengna a nasken a maisimpa dagiti mulada tapno mabalin pay a mailako dagitoy inton Nobyembre.
Pinagyamanan met ni Colte dagiti ayuda ken tulong manipud iti lokal a gobyerno uray pay nabayag daytoy a naipaay kadakuada.
Dinakamatna nga umdas latta met ti suplay ti sabong iti merkado publiko.
Gapu iti daytoy, impeksana a maisardeng koma ti panag-angkat ti Pilipinas iti sabong manipud iti dadduma a pagilian.
