BAGUIO CITY- Imbinsa ni Public Order and Safety Division Deputy Chief Daryll Kim Longid a saanen pay a maisubli ti 100% capacity iti night market sadiay Harrison Road.
Iti interview ti Bombo Radyo Baguio, kinunana nga agtalinaed ti 50% a capacity ti Baguio City Night Market uray awanen ti pandemya.
Gapu iti dayta, dumanon laengen iti 440 ti bilang dagiti pwesto sadiay manipod iti sigud a nasurok 1,000.
Inlawlawagna a sakbay ti pandemya, panggepdan iti pannakakissay ti bilang dagiti pwesto sadiay gapu iti kina-ilet unay ti kasasaad daytoy gapu iti kinaadu ti pwesto ken tattao nga agturturong sadiay.
Gapu iti dayta, kinunana nga iti kanito nga adda iti pangta ti seguridad sadiay kas kadagiti panagbomba ket narigat a maipasigurado ti seguridad dagiti tattao a posible pay a mangitunda iti stampede ken dadduma pay.
Kinunana a maliklikan ti nadakamat a sitwasyon babaen iti pannakakissay dagiti pwesto sadiay.
Innayunna met a saan a nadisenyo ti Harrison Road tapnu mang-akomodar iti sangaribo a bilang dagiti stalls iti night market.
Kagiddan iti dayta, kinunana a saan met nga apektado iti biruk dagiti night market vendors sadiay agsipodta naksayan metlang iti kompetisyon kadakuada kasaruno iti alternate a panaglako dagitoy.
