BAGUIO CITY- Mapadpadawayan ti 113 a barangay manipod iti 128 a pakabuklan a barangay iti Baguio City ti naideklara kas “drug cleared” ken ti panagtalinaed ti uppat a barangay kas “unaffected”.
Matartarigagayan met ti panakawaya-waya ti sangapulo ket maysa a daduma pay a barangay manipud iti impluwensia ti iligal a droga.
Karaman ditoy ti Lourdes Subdivision Extension, Dominican Hill, Fairview, Pinget, Lower Magsaysay, Sto. Nino Slaughter, Gibraltar, Loakan Proper, Kayang Extension, Irisan ken Bakakeng Central barangay.
Sigun kenni Baguio City Police Office Community Affairs Division Chief Judy Jasmin Palicos, manarimaan ti drug clearing operation kadagiti nadakamat a sangapulo ket maysa nga apektado pay iti iligal a drgoga.
Manipud Enero 1 agingga Marso 20, dinakamatna a nangiserbi ti opisinada ti maysa a search warrant ken naipatungpal ti 39 operation pakairaman ti 38 a buybust activity a nakumpiskaran ti P449,663 a gatad ti droga.
Inayonna a nakumpiskarda ti P703,696 a gatad ti iligal a droga pakairamanan ti 95 a gramo ti maatap a shabu ken 480.8 a gramo ti marijuana manipud Oktobre 1 agingga Disiembre 31 idi napan a tawen.
Kasaruno iti daytoy, kiniddaw ti mayor ti agtultuloy a suporta ti BCPO iti panggep ti gobierno a panakasustenir ti anti-illegal drugs campaign tapno mapagbalin a ‘drug-free’ ti Baguio City.
