BAGUIO CITY – Nakemmeg ti sangapulo ket dua a drug personalities ken nadadael ti P115-M ti gatad na a marijuana plants iti agtultuloy nga anti-illegal drug operation ti Police Regional Office Cordillera (PROCOR) manipud Hulyo 24 agingga Hulyo 30 ti agdama a tawen.
Nailista ti Baguio City Police Office ti kangatoan a bilang dagiti naarestar a dumanon iti sangapulo a drug personalities, sarunoen ti Abra PPO ken Benguet a nakaarestar iti saggaysa a drug personality.
Iti Baguio City, nabigbig dagiti nakemmeg a drug personalities a da David Bitao, 49; Jefferson Abor, 44; Marco Muleta, 29; Gerry Vic Bautista, 47; Albert Espiritu, 39; Johnson Segundo, 32; Edgar Zuñiga, 34; Darwin Dariano, 48; Jose Casauay, 42; ken ti 16-anyos a lalaki.
Iti met Abra ken Benguet, nabigbig dagitoy a da Clarence Bona, 28, ken Modesto Licudan, 59.
Iti nagsina nga anti-illegal drugs operation, nakumpiskar ti pakabuklan nga 18.32 grams ti maatap a shabu nga aggatad iti P124,576 ken 0.10 grams ti marijuana leaves nga aggatad iti P12.
Amin dagiti suspek ket sumangsango iti kaso a panaglabsing iti RA 9165 wenno ti Comprehensive Dangerous Drugs Act of 2002.
Kabayatanna, nadadael ti pakabuklan a 573,000 a puon ti fully grown marijuana plants nga aggatad iti P114.6-M gapu iti agtultuloy a marijuana eradication operations sadiay Kalinga.
Nadadael pay ti pakabuklan a 2,960 a puon ti fully grown marijuana plants nga aggatad iti P592-K sadiay Benguet.
