BAGUIO CITY – Temporaryo a nairikep ti municipal hall ti Lagawe, Ifugao idi kalman, September 14 kasaruno ti panagpositibo iti COVID-19 ti 12 nga empleyado manipod iti lima nga opisina ti lokal a gobyerno sadiay.
Naipasidong mtten iti swab test dagiti amin a regular ken job orders nga empleyado ti munisipyo.
Temporaryo a nairikep ti municipal hall ti Lagawe agingga nga adda ti resulta ti RT-PCR test dagiti nasao nga empleyado.
Babaen metlaeng iti nasao a test ket mabigbig dagiti mapalubusan a sumrek nga agtrabaho ken dagiti nasken a maipasidong iti quarantine.
Naibilin met ti nainget a panagtungpal dagiti empleyado a naipasidong iti RT-PCR test iti self-isolation bayat a maur-uray ti resulta.
Iti agdama, addaan ti Lagawe iti 102 nga aktibo a kaso ti COVID-19 iti agarup 10 a barangay sadiay, partikular sadiay Boliwong, Burnay, Caba, Cudog, Jucbong, Poblacion East, Poblacion West, Poblacion North, Poblacion South ken Tungngod.
