BAGUIO CITY – Mangrugi ti City Government ti Baguio iti panangisagana para iti posible a panag-merge dagiti barangay iti Central Business District (CBD), kalpasan ti Barangay ken SK Elections 2026.
Iti pannakiuman ti Bombo Radyo kenni Benjamin Macadangdang, Head ti Special Services Division ti City Mayor’s Office, maysa daytoy a plano a mangpapigsa iti panagserbi iti gobyerno ken mangpasayaat iti panangipatungpal dagiti programa iti uneg iti siudad.
Kinunana nga iti kanito a maipatungpal ti pilot testing, agbalin a maysa a barangay dagiti 14 nga agdama a barangay iti CBD.
Daytoy ket tapno nalaklaka ti koordinasion iti serbisyo para kadagiti umili.
Inlawlawag ni Macadangdang nga adda ti pagsayaatan daytoy kas iti napartak a panagresponde iti opisina, nasaysayaat a panangurnos kadagiti proyekto, ken nalawag a panagurnos iti administrasion ti barangay.
Malaksid iti dayta, posible a mapapintas ti panangipatungpal ti pondo ken panagserbi kadagiti constituents.
Iti kanito nga agballigi ti pilot implementation, daytoy ti basaran ti lokal a gobierno tapno maipatungpal met kadagiti dadduma a barangay iti siudad.
Maipalagip a dumanon iti 128 ti agdama barangay iti siudad, nasurok 40 ditoy ket kurang iti 5000 a populasion tapnu mabigbig kas Urban Area.//Bombo Khey Lorine Reparip
