Agarup 143 a Pilipino ti napakawan ti United Arab Emirates kagiddan ti selebrasyon ti Eid’l Adha idi napan a bulan ti Hunyo.
Inwaragawag daytoy ni President Ferdinand Marcos Jr. kalpasan a nagsaritada babaen iti telepono kenni United Arab Emirates President Sheikh Mohamed bin Zayed.
Sigun met kenni Foreign Affairs Undersecretary Eduardo De Vega, dagiti 143 a Pilipino a napakawan ket addaan iti saan unay a nadagsen a kaso.
Impeksa met ni President Marcos ti panagyamanna iti presidente ti United Arab Emirates gapu iti humanitarian assistance nga impaay ti nasao a pagilian iti Pilipinas idi dimmalapos ti bagyo.
Impanamnama pay ti Presidente a papigsaenna pay ti partnership ti Pilipinas ken United Arab Emirates para iti pagsayaatan dagiti umili dagitoy.
