Impakaammo ti Department of Social Welfare and Development (DSWD) a sigun iti umuna nga assessment dagiti social worker iti 15-anyos a suspek iti napasamak nga school shooting incident idiay San Jose National High School, idiay Tacloban, ammo daytoy ti kinadagsen ti inaramidnaa krimen.
Gapu iti daytoy, impeksa ni Social Welfare Secretary Rex Gatchalian a posible a dumalan ti nasao a kaso iti korte no sadino maamuwan nu nu awatenda ti assessment nga insayangkat ti nasao nga ahensya.
Kabayatanna, impeksa ni Gatchalian a maururay pay laeng ti psychological assessment iti 15-anyos a suspek pakairamanan ti 14-anyos a kaduana tapno maamuwan ti pudno a motibo dagitoy iti inaramidda a krimen.
Malaksid iti dayta, apaman a rumuar ti resulta ti nasao nga assessment, maamuwanda dagiti kaskenan nga intervention a mabalin nga ipaay ti DSWD kadakuda.
Maipalagip a napasamak ti pammaltog idiay San Jose National High School idiay Barangay San Jose, Tacloban City idi Hunyo 22 a nangitunda iti ipupusay ti tallo nga estudyante ken pannakadangran ti adu nga indibidual.
Sumangsango ti kaso a kriminal ti 15-anyos a suspek bayat nga exempted met iti criminal liability ti kaduana nga agtawen iti 14 kas nailanad iti Republic Act No. 9344 wenno Juvenile Justice and Welfare Act.
Iti agdama, adda pay laeng iti kustodiya ti DSWD rehabilitation center ti dua a menor de edad. //bombokaren.c.sapirao
